4 лютага ў Марачоўшчыну каля Косава з’ехалася некалькі дзесяткаў людзей, каб удзельнічаць у свяце, прысвечаным 264-м угодкам Тадэвуша Касцюшкі – нацыянальнага героя двух кантынентаў.
Часовы павераны ў справах ЗША ў Беларусі Майкл Скэнлэн
У цэрэмоніі прынялі ўдзел часовы павераны ў справах ЗША ў Беларусі Майкл Скэнлэн, генеральны консул Польшчы ў Брэсце Яраслаў Ксенжэк, саветнік пасольства Швейцарыі Дзітрых Драер, старшыня нацыянальнай камісіі Беларусі па справах ЮНЕСКА, пасол па надзвычайных даручэннях МЗС Уладзімір Шчасны, высокія чыноўнікі Брэсцкай вобласці і Івацэвіцкага раёну. Ганаровымі гасцямі былі і прадстаўнікі польскага Фонду імя Тадэвуша Касцюшкі.
Акрамя таго, прысутнічалі на свяце прадстаўнікі дэмакратычнай грамадскасці, дзеячы палітычных партый і рухаў, дзеячы культуры, гісторыкі, сярод якіх былі пісьменнік Уладзімір Арлоў і бард Зміцер Бартосік. Традыцыйна, сюды завіталі і нямала мясцовых жыхароў, а таксама прыехалі госці з Івацэвічаў, Бярозы, Баранавічаў, Брэста і іншых мясцін.
Да вялікага каменя з мемарыяльнай шыльдай Тадэвушу Касцюшку каля сядзібы дэлегацыямі былі ўскладзеныя вянкі і кветкі. Пасля гэтага афіцыйныя госці накіраваліся ў сядзібу-музей, дзе для іх была праведзена адмысловая экскурсія з праглядам дакументальнага фільма пра Касцюшку. Акрамя таго, у музеі была прадстаўлена выстава паштовых марак розных краін, прысвечаных Касцюшку і яго часу.
– Касцюшка – гэта частка нашай сумеснай гісторыі, гэта чалавек, які змагаўся за свабоду і быў увасабленнем лозунга “свабода, роўнасць, братэрства”, – адзначыў у сваім выступе ў сядзібе Касцюшкі генеральны консул Польшчы ў Брэсце Яраслаў Ксенжэк, – ён належыць усяму свету, але нарадзіўся ў гэтым месцы, таму вялікі гонар пабываць тут.
Падчас сваіх выступаў госці прэзентавалі свае падарункі музею, сярод якіх былі кнігі, малюнкі і нават манеты часоў Касцюшкі.
Уладзімір Арлоў (другі справа) з рэгіянальнымі актывістамі
Паралельна з афіцыйным мерапрыемствам у музеі, каля мемарыяльнага каменя адбыліся імправізаваныя выступы кіраўніка партыі БНФ Аляксея Янукевіча, старшыні грамадскага аргкамітэту па ўшанаванні Тадэвуша Касцюшкі Аляксандра Меха. Выканаў патрыятычныя песні бард Зміцер Бартосік, а пісьменнік-гісторык Уладзімір Арлоў падчас свайго выступу падкрэсліў:
– Няма ніякага сумневу, што Касцюшка — нацыянальны герой Беларусі. Такім яго ўжо даўно лічыць патрыятычнае беларускае грамадства.
Усім прысутным падчас мерапрыемства былі раздадзеныя памятныя буклеты пра Тадэвуша Касцюшку, выдадзеныя рэдакцыяй гісторыка-краязнаўчага бюлетэню “Рэха Берасцейшчыны”.
Каля помніка паўстанцам Каліноўскага на каталіцкіх могілках каля Косава
Пасля ўшанавання памяці Касцюшкі і ад’езду паслоў і чыноўнікаў, прадстаўнікі грамадскасці накіраваліся на каталіцкія могілкі каля Косава, дзе ў 1928 годзе польскімі ўладамі быў усталяваны трохметровы крыж-помнік у гонар іншых паўстанцаў – касінераў Кастуся Каліноўскага. Справа ў тым, што 2 лютага адзначаліся ўгодкі пачатку паўстання 1863-1864 гадоў на Беларусі. На каталіцкіх могілках у Косаве пахаваныя паўстанцы, сярод якіх вядомыя прозвішчы Лукашэвіча і Красінскага.
Тут таксама былі ўскладзеныя кветкі, пасля чаго госці з розных мясцінаў паслухалі расповед мясцовых краязнаўцаў аб падзеях паўстання 1863 года на Косаўшчыне і бліжэйшых рэгіёнах.
Дарэчы, нехта з удзельнікаў гэтай урачыстасці адзначыў, што Каліноўскага на афіцыйным узроўні так не ўшаноўваюць таму, што ён не з’яўляецца амерыканскім нацыянальным героем.
Гэтую думку складана было аспрэчыць, але дэмакратычная грамадскасць згадзілася з тым, што нельга ацаніць каштоўнасць незалежнай дзяржаўнасці без асэнсавання тых подзвігаў, што здзейснілі і Касцюшка, і Каліноўскі дзеля яе здабыцця.
Таму такія супольныя мерапрыемствы ўсіх патрыётаў нашай Бацькаўшчыны павінныя ўскласці даніну павагі тым высокім ідэалам, за якія продкі не шкадавалі нават свайго жыцця.
Журналісты "атакуюць" амерыканскага дыпламата
