Дзень святога Валянціна. Дзень, калі самым ужывальным словам становіццца слова “кахаю”, самым прыемным падарункам – кветкі, а самым распаўсюджаным “палівам” – свечкі. Рамантыка…
Ціхім каханнем к табе разгарацца…
М. Багдановіч
Інь і Ян
Прапаную вам сёння, аднак, “цвярозы” (зразумела, на колькі гэта магчыма) падыход да выраза “каханне”, а калі больш дакладна, “каханне з першага погляду”. Ці знаёмы Вам гэты выраз? Пэўна, знаёмы. А вось што вынікае з гэтага сцвярджэння?
Напрыклад, калі закаханасць (глыбокае эмацыйнае прыцягненне, моцнае сардэчнае пачуццё) можа ўзнікнуць усяго за якія-небудзь 30-40 секундаў, значыць прыкладна за гэты ж час можа скласціся і дастаткова аб’ёмнае ўяўленне пра чалавека.
Часам яно бывае настолькі яркае, што здольна назаўсёды прыцягнуць або адштурхнуць чалавека. Дарэчы, гэтае першае ўяўленне звычайна аказваецца правільным і так укараняецца ў чалавечай свядомасці, што змяніць яго надта цяжка. Як такое можа быць? Усё гэта тлумачыцца навукова.
Чалавечае вока счытвае 80% інфармацыі, і толькі 20% прыходзіцца на ўсе астатнія пачуцці. Прычым успрыняццё вобраза і яго апрацоўка галаўным мозгам адбываецца з такой хуткасцю, што свядомасць нават не здольна дакладна вызначыць, якая менавіта рыса здалася такой сімпатычнай або такой агіднай.
Такім чынам, любы чалавек, проста азірнуўшыся навокал, практычна несвядома здольны за лічаныя секунды “вылічыць” у натоўпе ўсе свае сімпатыі і антыпатыі. А зробленыя такім чынам і зноў-такі несвядома вывады ні змяніць, ні выкінуць, ні выпаліць, ні вырубіць сякерай практычна немагчыма. Ды і, магчыма, не варта. Проста давярайце сабе: свайму сэрцу і сваёй інтуіцыі.
І няхай Вам пашчасціць сустрэць бурлівае і бязмернае, высокае і гарачае, глыбокае і кранальнае, прыгожае і шчырае каханне!
Алена Дземідзюк
А як у нас?
Дзень святога Валянціна, або Дзень закаханых, даўно папулярны ў Еўропе і Амерыцы. Ва Усходнюю Еўропу гэтае свята прыйшло параўнальна нядаўна. Існуюць розныя думкі наконт паходжання свята закаханых.
Згодна адной з версіяў, гэта каталіцкае свята, па іншых дадзеных яно мае выключна свецкае паходжанне.
Любовь зла!
У дзень святога Валянціна закаханыя віншуюць адзін аднаго, адпраўляюць паштоўкі ў форме сэрца – так званыя “валянцінкі”, робяць падарункі, часта ўпершыню прызнаюцца ў каханні, выказваюць свае пачуцці пры дапамозе прыемных сюрпрызаў. Ды няшмат хто ведае, што ў праваслаўнай традыцыі ёсць “адпаведнік” свята закаханых 14 лютага – дзень святых Пятра і Феўроніі.
Праваслаўныя хрысціяне адзначаюць “Дзень закаханых” 8 ліпеня (25 чэрвеня паводле юліянскага календара). У ролі заступнікаў кахання і шлюбнай вернасці Расейская праваслаўная царква шануе мурамскіх святых Пятра і Феўронію, што жылі на рубяжы ХІІ-ХІІІ стагоддзяў.
Згодна жыцію святых, князь Пётр сеў на трон у 1203 годзе. За колькі гадоў да гэтай падзеі ён захварэў на праказу, ад якой ніхто не мог яго вылечыць. У сне князю адкрылася, што гэта можа зрабіць сялянская дзева Феўронія.
Пётр пакахаў Феўронію за яе набожнасць, мудрасць і дабрыню і даў абяцанне ажаніцца з ёй пасля выздараўлення. Феўронія вылечыла князя і выйшла за яго.
Муж ды жонка пранеслі каханне праз многія выпрабаванні. Яны праславіліся набожнасцю і міласэрнасцю. Памерлі святыя Пётр і Феўронія ў адзін дзень і час 25 чэрвеня 1228 года (па старым стылі), прыняўшы перад гэтым манаскі пострыг пад імёнамі Давід і Ефрасіння. Целы святых былі пакладзены ў адну труну.
Прыкладна праз 300 гадоў пасля смерці Пётр і Феўронія былі прылічаны Расейскай праваслаўнай царквою да ліку святых. Гісторыя іх кахання падрабязна і калярова апісана ў вядомай старажытнай “Аповесці пра Пятра і Феўронію”.
У праваслаўнай традыцыі “Дзень закаханых” адзначаецца не так шырока і пышна, як дзень святога Валянціна 14 лютага ў іншых хрысціян: без абмену сэрцамі, рамантычных вячэр і шумных увесяленняў.
У гэты дзень у праваслаўных веруючых прынята, перш за ўсё, наведваць храмы. У сваіх малітвах маладыя людзі просяць у Бога вялікага кахання, а людзі больш сталыя – сямейнай згоды.
Лічыцца таксама, што святыя Пётр і Феўронія даюць нябеснае блаславенне маладым.
Алена Маёвая
