Бясплатная вакцынацыя супраць грыпу ў Беларусі пачнецца з верасня і па плане закончыцца да 1 лістапада, паведаміла галоўны эпідэміёлаг Міністэрства аховы здароўя Іна Карабан на прэс-канферэнцыі ў Мінску.
Імунізацыя за кошт сродкаў рэспубліканскага і мясцовых бюджэтаў будзе праводзіцца кітайскай вакцынай “Флюваксін”, якая ўпершыню была выкарыстана ў Беларусі летась. Бясплатна прышчэпку будуць рабіць хворым з хранічнай паталогіяй органаў дыхання, сардэчна-сасудзістай, эндакрыннай сістэмы, грамадзянам з групы павышанай рызыкі. Акрамя таго, бясплатная імунізацыя будзе прапанавана дзецям.
Карабан адзначыла, што вакцына “Флюваксін” “добра зарэкамендавала сябе”. Згодна з інфармацыяй медустаноў, атрыманай пасля кампаніі вакцынацыі, вакцына добра пераносілася, пабочных рэакцый, павышэння тэмпературы на яе ўвядзенне практычна не было. Спецыяліст прывяла ў якасці прыкладу вакцынацыю супрацоўнікаў Міністэрства аховы здароўя, 87% якіх былі прышчэпленыя менавіта гэтай вакцынай. Ніхто з іх на грып не захварэў, скаргаў на пабочныя рэакцыі не было.
Усяго сёлета плануецца прышчапіць каля 3 млн. чалавек (каля 30% насельніцтва), значная частка з якіх будзе прышчэплена за кошт уласных сродкаў і сродкаў прадпрыемстваў. Гэта прыкладна на 10% вышэй за паказчыкі 2010 года. Карабан заклікала грамадзян вакцынавацца ад грыпу, паколькі “даказана, што вакцынацыя абараняе ад ускладненняў захворвання”.
Прагназуецца, што эпідэмія грыпу сёлета будзе сярэдняй ступені інтэнсіўнасці і пройдзе ў студзені—лютым. Паводле слоў галоўнага эпідэміёлага, у новым эпідсезоне будуць цыркуляваць тыя ж разнастайнасці вірусу грыпу, што і ў 2010 годзе. Прагнозы спецыялістаў будуюцца зыходзячы з сітуацыі ў краінах паўднёвага паўшар’я, дзе ўздым захворвання пачынаецца вясной.
Летась з кастрычніка па май у Беларусі на грып перахварэлі 210 тысяч чалавек, а на ВРВІ — каля 3 млн.чалавек.
