Лукашэнка абяцае стабілізаваць сітуацыю

Прэзідэнт Беларусі Аляксандр Лукашэнка заявіў, што сітуацыя на валютным рынку будзе стабілізаваная на працягу 1,5-2 месяцаў, дзеянні ўрада і Нацыянальнага банка ў гэтай сувязі будуць абвешчаныя на наступным тыдні.

“Паўтара-два месяцы ў нас на стабілізацыю на валютным рынку. Цалкам. Каб насельніцтва не проста слухала, верыла ці не верыла, а паверыла, што курс, які вызначаны, будзе дзейнічаць і далей, і сітуацыя будзе развівацца ў гэтым кірунку, які будзе пазначаны прэзыдэнтам”, – заявіў Лукашэнка ў чацвер на нарадзе па пытаннях сацыяльна-эканамiчнага развiцця ў Мінску, паведамляе “Інтэрфакс-Захад”.

Як адзначыў кіраўнік дзяржавы, “сёння мы правядзем нараду ў такім крузе. На падставе прапрацоўкі пытанняў на гэтай нарадзе, мы вызначым курс (дзеянні ўрада і НББ – ІФ). Далей цягнуць нельга, па выніках нарады мы павінны вызначыцца”, – сказаў прэзідэнт. Паводле яго словаў, “аўторак-серада – усё будзе зведзена ў адзін дакумент і вынесена на ўзровень прэзідэнта, на наступным тыдні я абвяшчу людзям, як будзе дзейнічаць урад і Нацыянальны банк у гэтай сітуацыі”, – заявіў А. Лукашэнка. “Будуць вызначаныя адказныя і кантралёры”, – дадаў ён.

Прэзідэнт адзначыў, што гэта нарада павінна паслужыць канчатковай выпрацоўцы курсу дзеянняў на бліжэйшы час. “Катастрофы няма, сітуацыя кантралюемая, але патрабуе прыняцця пэўных рашэнняў”, – сказаў Лукашэнка. Пры гэтым ён падкрэсліў, што “бягучы стан эканомікі кажа аб тым, што ў нас ёсць усе магчымасці для вырашэння пастаўленых задач”.