Кампазіцыя «Тэмпература» была запісаная гуртам «Дай Дарогу!» яшчэ ў 2003 годзе. Цяпер берасцейскія панкі выпусцілі кліп на гэтую песню з інтымам ды ў трохмернай графіцы.
Праца над кліпам пачалася яшчэ год таму. Мацёрых панк-рокераў натхніла летняе поле, усеянае кветкамі чырвоных макаў у сонечных прамянях. Зганялі за камерай ды пачалі здымаць. Да таго ж на радзіму завітала берасцейская мадэлька Паліна Цыолта, якая шмат гадоў працуе ў Токіо і Парыжы. Ёй і адвялі галоўную ролю ў відэа.
– Сюжэт кліпа распавядае пра вечныя тэмы кахання і развітання. Аднак, хто знаёмы з творчасцю ДД!, разумее, што не ўсё так проста, — кажа рэжысёр відэа Уладзімір Ківачук.
Відэа выканана выключна ўласнымі сіламі, аднак камандай выдатных спецыялістаў. Таму ў спецэфектах недастачы няма. Як кажуць стваральнікі, можна зрабіць адменны прадукт пры мінімальных затратах і што варта толькі верыць ды вельмі моцна хацець дамагчыся максімальнага выніку.
Паглядзець новы кліп на кампазіцыю “Тэмпература” можна тут.
Паводле: generation.by
