Эканоміка

Аплата за студэнцкі інтэрнат паднялася ў 6 разоў

Як раней і абяцаў намеснік прэм’ер-міністра Беларусі Анатоль Тозік, сённяшняга дня плата за пражыванне ў студэнцкім інтэрнаце стала  дыферэнцыраванай.

Цяпер студэнты Берасцейскага дзяржаўнага універсітэта,  якія пражываюць у інтэрнаце па вуліцы Пушкінскай павінны заплаціць за 1 месяц 105 тысяч рублёў.

–    Калі  я даведаўся пра гэта – быў у шоку. Цэны на ўсе тавары і паслугі ў нашай краіне за апошнія месяцы ўзраслі крыху больш, чым у 2 разы. Дык чаму  аплата за студэнцкі інтэрнат паднялася ў 6 разоў? І ўмовы ў нас зусім не “віп”.

Студэнтам, якія пражываюць у другіх інтэрнатах БрДУ,  пашанцавала крыху больш. Там пражыванне каштуе  35 тысяч рублёў. Але ім патрэбна даплаціць яшчэ 18 000 рублёў, за мінулы месяц, не гледзячы на тое, што, як паведамлялася раней на сайце, у інтэрнаце на Дзяржынскай больш месяца не было гарачай вады.

–    У сувязі з цяперашняй эканамічнай сітуацыяй, падняцце аплаты за інтэрнат для мяне не стала сенсацыяй. Дык таму лепш плаціць 35 000 рублёў за інтэрнат, чым 50-150 даляраў за кватэру.

Нагадаем, што атрыманыя за пражыванне ў інтэрнатах сродкі будуць паступаць у распараджэнне вышэйшай навучальнай установы. За гэтыя грошы ВНУ будзе аказваць дапамогу тым студэнтам, якія вымушаныя здымаць жыллё з-за недахопу месцаў у інтэрнатах. Цяпер кампенсацыя за здымнае жыллё складае каля 10000 рублёў у месяц.

0 Comments

Пакінуць адказ