Арыент-шоў – гэта модна! (ФОТА)

10 снежня ў Берасці прайшло чарговае штогадовае першынства ДУА «Сярэдняй школы № 33» па спартыўным арыентаванні ў зале. Дадзеныя спаборніцтвы праводзяцца ўжо ў чацвёрты раз.

 

Уявіце сабе, што ў звычайным спартзале пабудавалі дыстанцыю з падручных матэрыялаў (сталоў, крэслаў, парт, лавак і іншых прадметаў), на ёй размясцілі КП (кантрольныя пункты), намалявалі карты, і – арыент-шоў гатовае.

Спаборніцтвы складаліся з двух этапаў: дыстанцыі па выбары і арыентавання ў зададзеным накірунку. Усе забегі падзяляліся па ўзроставых групах.

Удзельнічалі ў стартах усе жадаючыя: і дарослыя і дзеці. У забегах прынялі ўдзел звыш 200 удзельнікаў.

Вялікай запамогай у гэтай справе быў лічбавай экран, на якім змяшчаліся вынікі спаборніцтваў. Наогул, кампутарная праграма для падліку вынікаў (тут выкарыстоўвалася сістэма SportIdent) і лічбавы экран, атрымаліся ўдалымі задумкамі, якія рэалізавалі арганізатары.

Старт атрымаўся відовішчным, барацьба за прызавыя месцы была напружанай. Інтрыга заставалася да фініша апошняга чалавека.

Пераможцы і прызёры былі ўзнагароджаны граматамі і каштоўнымі прызамі. Было вельмі весела, цікава і захапляльна!

Вынікі  першынства ДУА «Сярэдняй школы № 33» па спартыўным арыентаванні ў зале можна паглядзець на сайце клубаў спартыўнага арыентавання “Буг” і “Берестье“.

ДАВЕДКА «ДЗЕДЗІЧА»:

Арыент-шоў – новы відовішчны від спартыўнага арыентавання, які адрозніваецца ад класічнага тым, што спартсмены арыентуюцца на маленькай пляцоўцы сярод штучных перашкод. Працягласць дыстанцый невялікая – ад некалькіх дзесяткаў метраў да паўкіламетра. Арыент-шоў выдатна кампенсуе недахоп відовішчнасці класічнага спартыўнага арыентавання, а таксама дапамагае асвоіць асновы арыентавання пачаткоўцам.