Семінар ад Офіса па правах людзей з інваліднасцю адбыўся 1 лютага ў Берасці ў рамках інфармацыйнага тура па Беларусі.Вёў семінар каардынатіар Офіса Сягрей Драздоўскі.
Галоўная праблема, якая была акрэслена на семiнары – гэта асаблівае стаўленне да людзей з інваліднасцю ў сучасным грамадстве. Справа ў тым, што такія людзі звычайна ўспрымаюцца 
як аб’екты медыцынскай дапамогі, тады як на праблему лепей глядзець з пункту гледжання правоў чалавека і сацыяльнай аховы. Мэтай дапамогі людзям з інваліднасцю павінна быць не проста забеспячэнне іх сродкамі выжывання, а ўключэнне іх у жыццё грамадства, стварэнне роўных магчымасцяў для ўсіх.
Таму сёння для Беларусi асаблівае значэнне мае Канвенцыя ААН па правах інвалідаў (Беларусь – адзіная краiна ў Еўропе, што пакуль не прыняла яе). Яна дазволіць больш шырока глядзець на праблему і глыбей яе разумець. Прынцыпы, на якіх яна заснавана (адсутнасць дыскрымінацыі, разумнае прыстасаванне, агульнадаступнасць і салідарнасць), з’яўляюцца асновапалагаючымі для стварэння ўмоў для жыцця людзей з абмежаванымі фізічнымі магчымасцямі ў сённяшнім Беларускім грамадстве. Акрамя таго, людзі і арганізацыі, якія распараджаюцца сродкамі на дапамогу людзям з інваліднасцю будуць мець больш справаздач і, як след, больш адказнасці.
Пад час семінара працавала бясплатная юрыдычная кансультацыя для людзей з інваліднасцю, а таксама шла гарачая дыскусія пра тое, што можна зрабіць і як дапамагчы людзям.
Стаўленне да людзей з інваліднасцю ў нашай краіне даказвае, наколькі беларусы не талерантныя. Мы прывыклі казаць пра гэтую нашую якасць, але на справе карціна складаецца больш чым сумная. Інвалідам прасцей сядзець дома – бо нават не ва ўсіх буйных крамах ёсць пандусы, не кажучы аб грамадскім транспарце, у якім проста немагчыма ездзіць. А якіх намаганняў каштаваў пошук гасцініцы для самаго Сяргея Драздоўскага, які сам сядзіць у інваліднай калясцы. Атрымліваецца, людзі абмежаваныя не ў фізічных магчымасцях, яны абмежаваныя ў свабодзе…
Каардынатар Офіса па правах людзей з інваліднасцю Сяргей Драздоўскі
