Мода будучыні па бабчыных рэцэптах

Чаму Nike выпускае красоўкі з перапрацаваных пластыкавых бутэлек, а H&M шчыра інфармуе сваіх пакупнікоў пра змест шкодных хімічных рэчываў у сваіх матэрыялах?

Экалагічнасць сёння з’яўляецца модным трэндам. А пачалося ўсё з таго, што ў мінулым годзе “Грынпіс” выявіў сувязі некалькіх fashion-рытэйлераў з фабрыкамі, якія забруджваюць рэкі Кітая. Было праведзена даследаванне, якое пацвердзіла наяўнасць у прадукцыі гэтых кампаніяў наніфенол–этаксілатаў (таксічных рэчываў). У ганебны спіс трапіў гігант causal-індустрыі, другі па велічыні рытэйлер адзення H&M і буйнейшыя вытворцы спартовай вопраткі – Nike, Adidas і Puma .

Выбухнуў скандал. “Грынпіс” распачаў дэтокс-капанію, заклікаючы фэшн-індустрыю адмовіцца ад тэхналогій, што забруджваюць навакольнае асяроддзе. H&M згадзіўся абнародаваць дадзеныя пра ўсе хімічныя рэчывы, якія выкарыстоўваюць іх дастаўляльнікі пры вытворчасці матэрыялаў. Лідары рынка спартовай моды далучыліся да дэтокс-руху і абавязаліся выключыць небяспечныя рэчывы з усіх ланцугоў вытворчасці да канца 2020 года.

Акрамя “раззбраення” вытворчасці, свядомыя кампаніі актыўна практыкуюць выкарыстанне другасных матэрыялаў, каб паменшыць колькасць смецця на планеце і зэканоміць прыродныя рэсурсы.

Кампанія Nike пачала вырабляць форму клубаў “Спартак” і “Зеніт” з перапрацаваных пластыкавых бутэлек.Вытворчасць уключае збор бутэлек, ачыстку і пераплаўку. У 2010 годзе кампаніяй было выкарыстана больш за 13 мільёнаў бутэлек.

…

Шматлікія вытворцы адзення прытрымліваюцца этычных прынцыпаў на ўсіх ступенях вырабу прадукцыі. Матэрыялы пастаўляюцца спецыяльнымі эка-фермамі, дзе вырошчваюць расліны і жывёлін без выкарыстання хімічных угнаенняў, генетычных і гарманальных стымулятараў. Пры гэтым фермы не выкарыстоўваюць паліўную энэргію і іншыя тэхналогіі, што забруджваюць навакольнае асяроддзе, а таксама забяспечваюць годныя ўмовы працы людзей на прадпрыемстве.

Эка-вопратка з-­за асаблівасцей вытвочасці сёння даволі дарагая. Але з пераходам большасці брэндаў на зялёныя рэйкі канкурэнцыя ў гэтай сферы пабольшыцца, ды і тэхналогіі распрацуюцца. Таму людзям будучыні прырода будзе куды бліжэй да цела, чым нам.

Самы вялікі сучасны рытэйлер эка-моды Patagonia існуе ўжо 40 год і прадстаўлены ў шматлікіх краінах. Інфармацыю пра этычныя тэхналогіі вытворчасці і эка-брэнды вы можаце знайсці на сайце www.ecofashionworld.com

***

Нажаль, ні ў Беларусі, ні ў Расеі экалагічныя маркі не прадстаўленыя. Набыць рэчы можна толькі праз інтэрнэт­крамы сусветных вытворцаў. У Беларусь ладзіць бясплатную дастаўку фірма aquestionof.net(Кошты: футболка ~ 40 EUR сўітшот ~ 80 EUR. Аплата праз картку VISA, MasterCard, Maestro).

Раю маладым беларускім дызайнерам і мадэльерам не ігнараваць новыя тэндэнцыі. Чаму б Беларусі не заняць пакуль яшчэ вольную нішу ў зялёнай модзе і вырабляць вопратку з лёну, канопляў, кукурузы? Але рашэнні трэба прымаць вельмі хутка, бо ў 2020 годзе ў фэшн-індустрыі чакаецца эка-бум.

Альбіна ТРУС