Выпускнікі школы №1 у Гарадку здавалі сёння беларускую мову ў экстрэмальных умовах. Некалькі дзён перад тым яны рыхтаваліся да іспыта па матэматыцы, бо настаўнікі нешта паблыталі ў раскладзе.
Расклад іспытаў для выпускнікоў – адзіны, яго распрацоўвае Міністэрства адукацыі. Як магло здарыцца, што школьнікаў дэзарыентавалі, будзе разбірацца Гарадоцкі раённы аддзел адукацыі.
Скандальны інцыдэнт здарыўся 1 чэрвеня. Адзінаццацікласнікі прыйшлі пісаць выніковую кантрольную па матэматыцы, да якой рыхтаваліся некалькі апошніх дзён, але высветлілася, што іх чакае пераказ па беларускай мове. І вучні, і іх бацькі абураныя: па віне настаўнікаў была сарваная падрыхтоўка да іспыта. А адзнака за пераказ, між тым, уплывае на выніковы бал атэстату па беларускай мове.
Зразумела, што ў стрэсавым стане ды без падрыхтоўкі многія вучні напісалі пераказ горш, чым маглі б. Бацькі і дзеці вінавацяць настаўнікаў, якія чамусьці не ведалі распараджэнняў Міністэрства адукацыі.
Цяпер вырашаецца пытанне, хто вінаваты ў інцыдэнце, і якім чынам выправіць сітуацыю – або “замяць” справу, як нічога й не было, або прызначыць дзень для перасдачы іспыта па беларускай мове – у спакойнай абстаноўцы і пасля належнай падрыхтоўкі.
Крыніца: spring96.org
