Брэсцкая “Мова Нанова” з дзіцячым водгукам.
24 студзеня ў Брэсце прайшлі чарговыя заняткі “Мова Нанова”. У праграме — беларускамоўны “дзіцячы садок”, незвычайны батл і спецыяльны госць.
Ужо амаль год брэсцкія аматары роднай мовы збіраюцца на сустрэчах, якія з’яўляюцца самымі масавымі ў свеце курсамі беларускай мовы. Кожны жадаючы можа далучыцца да заняткаў, якія да таго ж праводзяцца бясплатна. Дарэчы, праект быў названы “Падзея года 2014” на V фестывалі нефармальнай адукацыі.
Даведка: V фестываль нефармальнай адукацыі арганізаваны Асацыяцыяй дадатковай адукацыі, Мінскім міжнародным адукацыйным цэнтрам імя Йоханесса Рау і Прадстаўніцтвам Інстытута міжнароднага супрацоўніцтва Асацыяцыі народных універсітэтаў Германіі, праводзіца з 2006 года.
Курсы пашыраюцца
“Мова Нанова” пачала свой суботні вечар з асобных заняткаў для дзяцей. Гэта новы праект, дзякуючы якому аўдыторыя курсаў павялічылася амаль удвая. “Мова Нанова дзеткам” стартавала на мінулым тыдні. Курсы вядзе Алеся Грынь:
“Я працую настаўніцай пачатковых класаў і сутыкаюся з тым, што дзеці не любяць беларускую мову па адной прычыне:ім складана. Яны не чуюць яе ў побыце, таму што ўжо няма бабуляў і дзядуляў, якія былі носьбітамі гэтай мовы. А тое,што складана, заўсёды не вельмі цікава рабіць. Гэтыя заняткі —спроба адысці ад акадэмічных урокаў беларускай мовы і давесці, што вывучаць мову можна цікава і займальна. На ўроках мы бавімся, гуляем, смяемся, будзем і песні спяваць, і танчыць. Разам з гэтым, канешне, мы вывучаем мову”.
“У далейшым, калі стане цяплей, мы плануем правесці беларускамоўны квэст па Брэсцкай крэпасці. Ёсць ідэя беларускамоўнай экскурсіі. Абавязкова будзе занятак, звязаны з музыкай. Я ведаю, што шмат бацькоў і дзетак валодаюць музычнымі інструментамі. Таксама мы чакаем “Лямцавую батлейку”, якая прывязе міні-спектакль на беларускай мове. Хочацца неяк разнастаіць заняткі, каб і дзецям, і дарослым было цікава”.
Не так, як у школе
Тэмай першых дзіцячых заняткаў сталі свойскія жывёлы. У маленькіх навучэнцаў была магчымасць прывесці сваіх любімцаў і расказаць пра іх. Так, дзесяцігадовы Глеб распавядаў нам пра свайго сабаку: “Завялі Пудзю, каб жылося весялей”.
Акрамя гэтага нагадалі пра колеры, разучылі лічылку, правялі некалькі гульняў, у тым ліку, з удзелам бацькоў. Бачна прынцыповая розніца з заняткамі ў школе: за час, праведзены з дзецьмі, здаецца, не было і хвіліны без усмешкі. Усе адчувалі сябе нязмушана і з цікавасцю ўдзельнічалі ў працэсе.
Дарослыя на змену дзецям
Пасля заканчэння дзіцячых заняткаў памяшканне хутка запоўнілася дарослымі. Тут была як моладзь, так і людзі сталага ўзросту. Адна з арганізатараў Воля Малафеечава адзначыла:
“Можна сказаць, што 50 адсоткаў аўдыторыі — гэта адны і тыя ж людзі, якія негледзячы на тое, што мы мяняем месца правядзення заняткаў, усе роўна прыходзяць і ўдзельнічаюць. І прыкладна кожны раз прыходзяць каля 8-10 новых людзей.”
На пачатку заняткаў адзін з наведвальнікаў курсаў Уладзімір Саланец прэзентаваў унікальную калекцыю музычных дыскаў. Іх аўтары запісалі беларускую музыку ад паланэзаў да джазу. З’явілася шмат зацікаўленых.
Незвычайны батл
У гэты раз вядоўцы Іна Хоміч і Максім Хлябец прапанавалі пагаварыць пра тарашкевіцу і наркамаўку. На занятках разабралі правапіс, знайшлі прынцыповыя адрозненні, а таксама вызначылі, каму што бліжэй.
Пасля гэтага адбыўся сапраўдны батл. Усіх падзялілі на каманды, незалежна ад іх поглядаў. Кожная з каманд павінна была прыводзіць аргументы на карысць свайго правапісу. Пераможцы атрымалі прыемныя падарункі за большасць доказаў. Але па выніку выявіць лепшы правапіс так і не змаглі.
“Мне цяжка казаць, які правапіс мне бліжэй, таму што я ведаю толькі наркамаўку. Тарашкевіца таксама мяне цікавіць, і калі б я яе больш ведаў, то таксама карыстаўся бы”. Спадар Мікалай
“Для мяне больш прыемны правапіс наркамаўка, таму што я вывучала яго ў школе і карыстаюся зараз на працы. Таксама ўсе дакументы раблю толькі на наркамаўцы. Не ведала ўсіх акалічнасцей тарашкевіцы, таму тэма была вельмі цікавай для мяне“. Спадарыня Ірына
Цікавы госць
На прыканцы заняткаў выступіў запрошаны госць Валер Булгакаў — беларускі філолаг, галоўны рэдактар часопісу “ARCHE”. Ён прэзентаваў новы расійска-беларускі слоўнік і распавёў шмат цікавага з нашай гісторыі і культуры. Усе жадаючыя мелі магчымасць набыць часопісы і кнігі “ARCHE”.
“Госць цікавы. Пабольш бы такіх гасцей, якія могуць цікава паведамляць і нешта прынесці. З задавальненнем хаджу на заняткі. Падабаецца іх атмасфера”. Спадар Уладзімір
Наведвальнікі падзяліліся сваімі ўражаннямі:
“Курсы “Мова Нанова”— гэта не толькі прыйсці, паслухаць і сябе як-небудзь у суботу пацешыць, а таксама і пашырыць веды на навуковыя тэмы. Напрыклад, сёння быў цікавы выступ, ён нам даў шмат гістарычных лекцыйных ведаў”.
“Только я буду пока говорить по-руссски .Потому что я еще язык не развязала. Я второй раз на занятиях. Очень интересно, сама идея замечательная, великолепная форма занятий. Я родилась в Литве и совершенно не учила белорусский язык. Но сегодня я все понимала по-белорусски. Откуда ко мне это пришло? Я слушала радио и смотрела белорусские передачи, которых к сожалению очень мало на белорусском языке”.
“Крэатыўная форма заняткаў. Так больш адкладаецца ў галаве”.
