БДУ вяртае свае пазіцыі ў рэйтынгу Webometrics

Паводле абноўленых дадзеных галоўны беларускі ўніверсітэт цяпер займае 612 месца ў сусветным рэйтынгу ўніверсітэтаў Webometrics.

З мінулага замеру БДУ падняўся адразу на 61 адну пазіцыю і знаходзіцца ў тройцы лепшых універсітэтаў СНД.

Найлепшым вынікам БДУ быў радок 595, які ўніверсітэт атрымаў у 2012 годзе, але наступныя намаганні ўніверсітэту ўзняцца вышэй доўгі час не прыносілі плёну. У выніку ў ліпені 2014 году БДУ апынуўся на 673 пазіцыі.

Вядомы адукацыйны рэйнтынг 12 год складае група даследчыкаў з Гішпаніі. Грунтуецца ён на такіх няхітрых паказчыках, як бачнасць сайта — колькасць спасылак з боку знешніх рэсурсаў на яго, а таксама на колькасці дакументаў у фарматах PDF PS, PPT, DOC, размешчаных на рэсурсе і колькасці дакументаў сайту ўніверсітэту, якія трапілі ў базу Google Scholar — базу, прызначаную для пошуку навуковай літаратуры. Адзіным паказчыкам, што дэманструе акадэмічную паспяховасць універсітэту, ёсць колькасць навуковых публікацый ягоных супрацоўнікаў, што трапілі ў лік 10% з найбольш цытаваных у той ці іншай галіне веды.

Каб узняцца ў рэйтынгу беларускія ВНУ намагаюцца аблічбаваць болей навуковых працаў ды змясціць іх сайце, бо на іншыя крэтэры адміністратыўнымі метадамі паўплываць не магчыма. Тым не менш гэты спосаб не дае асаблівага плёну. Хоць БДУ з 1757-месца у 2008 годзе выбраўся урэшце ў першую тысячу, аднак іншыя беларускія ВНУ не маюць і гэтага поспеху. БНТУ, БДУіР і Гродзенскі дзяржаўны ўніверсітэт імя Янкі Купалы знаходзіцца сярод трэцяй тысячы ВНУ свету паводле бачнасці іх поспехаў у Сеціве.

generation.by