25 вольных месцаў: магістратура ў Варшаве

Цэнтр даследванняў Усходняй Еўропы Варшаўскага ўніверсітэта абвяшчае конкурс на атрыманне 25 стыпендый на двухгадовае навучанне ў магістратуры.

Праграма разлічана на кандыдатаў з Усходняй Еўропы, Балканаў (не з ЕЗ), Каўказа і Цэнтральнай Азіі.

Кандыдаты павінны мець навуковыя дасягненні і/або вылучацца арганізацыйнай актыўнасцю і мець перспектывы выкарыстання набытых у Польшчы ведаў у краіне паходжання, у розных галінах навуковага жыцця і грамадскай дзейнасці.

У праграму навучання ўваходзяць пытанні гісторыі і сучаснасці Цэнтральнай і Ўсходняй Еўропы, Расіі і ўсёй посткамуністычнай прасторы. Асаблівая ўвага надаецца гісторыі, нацыянальным і паліталагічным праблемам, разглядаюцца таксама пытанні гісторыі мастацтва, літаратуры, культуры, сацыялогіі, геаграфіі, дэмаграфіі, права, эканомікі і інш. Праграма прадугледжвае таксама вывучэнне адной мовы рэгіёна.

Навучанне вядзецца па шасці спецыяльнасцях:

• Усходняя Еўропа;
• Цэнтральная Еўропа;
• Балканы;
• Расія;
• Каўказ;
• Цэнтральная Азія.

Фінансавыя ўмовы

Стыпендыя прадугледжвае:

• вызваленне замежных студэнтаў ад аплаты навучання ў Варшаўскім універсітэце (3000 еўра за год);
• сацыяльную стыпендыю ў памеры 1350 злотых;
• курсы польскай мовы (1 або 2 семестры);
• курсы рэгіянальнай мовы (4 семестры);
• частковую аплату коштаў навуковых паездак на першым курсе навучання.

Каб скарыстацца стыпендыяй, неабходна выканаць умовы, прадугледжаныя рэгламентам Стыпендыі, а таксама падрыхтаваць выніковую пісьмовую магістарскую дысертацыю на польскай мове.

Важныя тэрміны 

Да 15 сакавіка 2016 года неабходна даслаць камплект дакументаў на адрас электроннай пошты stypendia.studium@uw.edu.pl.

Да 30 красавіка 2016 года – абвяшчэнне вынікаў першага этапу конкурсу.

1 мая – 15 чэрвеня 2016 года – другі (пісьмовы тэст) і трэці (сумоўе) этапы конкурсу. Адбор будзе праводзіцца на тэрыторыі дыпламатычных прадстаўніцтваў Рэспублікі Польшча або, у выключных выпадках, у Польшчы.

1 ліпеня 2016 года – абвяшчэнне спісу абраных стыпендыятаў.

Кандыдаты, якія недастаткова добра валодаюць польскай мовай, будуць залічаны ўмоўна (на падставе вельмі добрых прадметных вынікаў) і будуць абавязаны самастойна вывучаць польскую мову. У сярэдзіне лістапада яны павінны будуць здаць дадатковы экзамен па польскай мове.

Навучанне

Заняткі пачнуцца 5 верасня 2016 года з падрыхтоўчага курсу.

Стыпендыят, які выканае ўсе патрабаванні праграмы, паспяхова скончыць усе семестры, а таксама напіша і абароніць выніковую працу, атрымае дыплом аб паслядыпломным навучанні ў магістратуры Цэнтра даследванняў Усходняй Еўропы Варшаўскага ўніверсітэта. Дыплом з’яўляецца паўнавартасным дакументам аб заканчэнні ВНУ у Польшчы, які прызнаецца ў краінах Еўразвязу.

Дэдлайн – 15 сакавіка 2016 года.

Крыніца: adukacyja.info