Агенцтва рэгіянальнага развіцця “Дзедзіч” працягвае радаваць гараджан афлайн-мерапрыемствамі. Гэтым разам берасцейцаў чакае лекцыйны міні-фестываль.
18 жніўня ў адноўленым дворыку “Дзедзіча” з 16:00 да 19:10 адбудзецца гістарычны нон-стоп марафон ад даследчыкаў старажытнага Берасця. Лекторый “#999” прысвечаны гадавіне набыцця горадам Магдэбурскага права 15 жніўня 1390г. Мерапрыемства будзе складацца з 4 лекцый і дыскусіі.
Уваход бясплатны. Папярэдняя рэгістрацыя не патрабуецца. Можна праслухаць усіх спікераў ці абраць найбольш цікавыя для сябе выступы.
Праграма лекторыя:
- 16:00-16:30 – лекцыя “Тапанімія і тапаграфія старажытнага Берасця”. Спікер: гісторык Антось Дацкевіч;
- 16:40 – 17:10 – лекцыя “Прутамі, локцямі і стапамі змяніла Берасьце права магдэбурскае”. Спікер: доктар мастацтвазнаўства і архітэктар Ірына Лаўроўская;
- 17:20-17:50 – лекцыя “Сярэднявечная фартыфікацыя”. Спікер: краязнаўца і рэканструктар Андрэй Варабей, кiраўнiк мясцовага дабрачыннага фонда “Фартыфiкацыя Брэста”;
- 18:00-18:30 – лекцыя “Знаходкі старога Берасця”. Спікер: краязнаўца і калекцыянер Іван Чайчыц;
- 18:40-19:10 – дыскусія “Фарматы рэпрэзентацыі берасцейскай гісторыі”. Мадэратар: культурны мэнэджэр Наталля Зданевіч, “Фонд развіцця Брэсцкай крэпасці”.
Лекторый “#999” мае на мэце актуалізацыю сярэднявечнай гісторыі Берасця. Па словах дырэктара АРР “Дзедзіч” Дзмітрыя Шыманскага лекторый папярэднічае грамадскай дыскусіі па формах і тэматыцы гарадскіх святаў:
– Мы вядзем перамовы з арганізатарамі знаных вулічных імпрэз, фестываляў з Беларусі, Украіны і Польшчы. Хочам запрасіць іх у Берасце, каб напярэдадні 1000-годдзя горада прынесці новыя ідэі, наладзіць публічную дыскусію па сучасных формах правядзення вулічных святаў. У бліжэйшыя месяцы мы запросім берасцейцаў на цэлы цыкл сустрэч з мэтай вывучэння новых падыходаў да арганізацыі культурных імпрэз, пошуку і абмеркавання прапаноў па фармаце і праграме вулічных мерапрыемстваў, па тэмах, вартых асвятлення падчас святкавання 1000-годдзя Берасця.
Увага, валанцёры! Для бездакорнай арганізацыі мерапрыемства, арганізатарам патрэбна валанцёрская дапамога па:
- уладкаванні прасторы да і пасля мерапрыемства;
- суправаджэнні лектараў;
- арганізацыі актыўнасцяў.
Калі вас зацікавіў новы вопыт, а з жаданнем дапамагчы развіццю беларускай культуры вы не развітваецеся 24/7, тады патрэбна ўсяго толькі перайсці па спасылцы (https://goo.gl/ZPbGys) і запоўніць анкету. Дэдлайн – 15 жніўня.
