Учора ў рамках праекта Мейсца, які рэалізуе моладзевая ініцыятыва “Аазіс”, прайшла сустрэча з гарадской ляснічай Берасця Ленай Штык. Лена распавяла пра самыя непатрабавальныя хатнія расліны, пра тое, якія кветкі не варта даваць есці катам, і як некаторыя расліны забіраюць з паветра кісларод ноччу.
Памятаеце, чаму важна мець жывыя расліны дома?
- Расліны вылучаюць кісларод. Праўда, некаторыя робяць гэта толькі днём. Калі сонца заходзіць, расліны пачынаюць актыўна паглынаць кісларод у вашых пакоях. Так робіць большасць кветак, акрамя суккулентаў, герані, сансэвіерыі, хларафітума, герберы, дзекабрыста, спаціфіллума і архідэі.
- Кветкі ўвільгатняюць паветра. Расліна на 97% аддае сваю вільготнасць памяшканню.
- Кветкі чысцяць паветра ад пылу і шкодных рэчываў у кватэры. А таксама паглынаюць электрамагнітнае выпраменьванне ад гаджэтаў.
Некалькі парад ад гарадской ляснічай Лены Штык:
- Лепшае месца для куплі раслін – куфар. Там часта можна знайсці велізарныя расліны, значна больш танныя, чым у крамах, а таксама рэдкія віды раслін.
- Практычна ўсе расліны, якія былі папулярныя ў СССР, карысныя, таму што на ўсе 100% спраўляюцца з ачысткай паветра. Успамінайце, якія кветкі вы часта бачылі дома ў бабулі?
- Калі загінула кветка – значыць не ваша. Не адчайвайцеся, выкінеце ў смецце і забудзьцеся!
Топ-3 самых непатрабавальных раслін:
- Спаціфіллум;
- Заміакулькас;
- Сансэвіерыя.
Пасля нясумнай лекцыі Лена прадэманстравала перасадку Заміакулькаса, карані якога пачалі падгніваць. У прасторы “Мір”, дзе праходзіла лекцыя, працуе куток абмену раслінамі: вы можаце прыйсці са сваёй раслінай і абмяняць яе на тую, якая ёсць у кутку. Калі вы прыйдзеце з пустымі рукамі, і захочаце ўзяць нешта дадому, можаце заплаціць 5 рублёў і забраць любую расліну.
Арганізатар праекта «Мейсца» – культурна-асветніцкая ўстанова «Брэсцкі Аазіс». Інфармацыйная і метадычная падтрымка: Агенцтва рэгіянальнага развіцця «Дзедзіч».
