У мінулыя выхадныя ва ўтульным кафэ «Progresso» на Машэрава, 53, прайшла чарговая сустрэча клуба настольных гульняў, заснаванага двума энтузіястамі – Любоўю і Антонам. Дружны дуэт збірае людзей не так даўно, але ўжо паспеў стварыць сапраўдную атмасферу сяброўства і паразумення.
Ідэя клуба ўзнікла, калі Любові і Антону надакучыла гуляць у настолкі ўдваіх. Пасля візіту да сяброў, куды яны прыхапілі некалькі гульняў, стала зразумела: для поўнага задавальнення неабходна вялікая кампанія. Так пачалася місія па пошуку аднадумцаў. Асноўная мэта праекта – дапамагчы людзям знаёміцца і знаходзіць новых сяброў. Дарослыя часта сутыкаюцца з цяжкасцямі ў пошуку новай кампаніі, асабліва пасля 20 гадоў, і менавіта такія сустрэчы ствараюць ідэальныя ўмовы для зносін.
Арганізаванасць і крэатыўнасць – вось што дапамагае Любові і Антону спраўляцца з праектам. Яны расказваюць, што іх натхняе бачыць, як людзі становяцца больш адкрытымі і ўпэўненымі, як адыходзіць сарамлівасць і страх новых знаёмстваў.
Каб далучыцца да гульні, дастаткова проста прыйсці. У клубе рады новым асобам! У групе ў Тэлеграме ўдзельнікі галасуюць за час сустрэчы, каб загадзя ведаць, колькі людзей прыйдзе і якія гульні будуць актуальныя.
На гэты раз усе сабраліся за вялікім сталом у віп-зале «Progresso». Менавіта гэтае кафэ стала іх любімым месцам дзякуючы прасторнаму сталу, які месціць да дзесяці чалавек, а таксама выдатнай кухні і ўважліваму персаналу.
Аўдыторыя клуба вар’іруецца ад 18 да 35 гадоў. Атмасфера на сустрэчах заўсёды дружалюбная. Калі збіраецца шмат людзей, яны дзеляцца на групы і гуляюць ў 3-4 настолкі паралельна. Кожны можа знайсці нешта цікавае для сябе. Склад удзельнікаў перыядычна мяняецца, новыя асобы прыходзяць даволі часта, што дадае свежасці і разнастайнасці.
Арганізатары імкнуцца рэгулярна абнаўляць свой арсенал настолак, купляючы новыя гульні кожныя адзін-два тыдні. Гэта дазваляе падтрымліваць цікавасць удзельнікаў і прыўносіць разнастайнасць у кожную сустрэчу. На гэты раз клуб паспрабаваў гульню «Рызыка».
Клуб настольных гульняў працягвае расці і развівацца, ствараючы магчымасць знаходзіць сяброў і бавіць час ў расслабленай атмасферы. Калі вы шукаеце кампанію для гульняў ці проста хочаце пагутарыць – не прапусціце шанец далучыцца да клуба ў наступны раз!
- Інстаграм старонка клубу: https://www.instagram.com/nastolki_brest
