Для кожнага з нас словы “макіяж”, “фрызура”, “фотаздымкі” значаць нешта сваё. Для некага гэта частка паўсядзённасці, для некага – спосаб паказаць сваю індывідуальнасць, нехта лічыць гэтыя словы сінонімам марна патрачанага часу, а хтосьці адразу акунаецца ў святочны настрой. Вікторыя, па ўласным прызнанні, любіць знаходзіцца па розныя бакі аб’ектыву, яна – арганізатарка розных тэматычных мерапрыемстваў і ўладальніца фотастудыі PANI.
Адным з івэнтаў, арганізаваных Вікторыяй, стала дабрачыннае мерапрыемства, прымеркаванае да Дня Маці і накіраванае на тое, каб дапамагчы жанчынам, якія выхоўваюць цяжкахворых дзяцей, расслабіцца, адпачыць ад паўсядзённых клопатаў і перажыванняў, адчуць сябе прыгожымі і прывабнымі, атрымаць цудоўныя фотаздымкі.
“Калі я прапанавала гэтую ідэю дзяўчынам, якія былі са мной у камандзе, ўсе згадзіліся адразу. Наогул, нават не прагаворвалася, што і як” – адзначае Вікторыя.
Усяго ў праекце ўдзельнічала 10 мам і праз падзел таймінгу ўсе працавалі хутка і скааперавана.
У праекце прымалі ўдзел фатографкі, стылісткі, візажысткі і спецыялісткі па валасах, кожная з іх старанна выконвала сваю частку працы, каб у выніку атрымаць ашаламляльны рэзультат.
Падчас правядзення мерапрыемства было выкарыстана адзенне ад брэсцкага брэнда Ramonki.
“Гэта жанчыны, якія прысвяцілі сваё жыццё дзецям. Калі я спытала ў адной з мам аб тым, ці фатаграфавалася яна калі-небудзь – яна сумелася, сканфузілася, я б сказала, нават спалохалася і сказала “не”. Для чалавека, які часта быў па адзін і па другі бок аб’ектыва гэта было… Рэзанавала, калі шчыра. Мне стала неяк сумна і хацелася падарыць гэтым жанчынам трошкі свята, даць ім трошкі адчуць сябе ў зусім іншым амплуа і ў нашай вялікай каманды ўсё атрымалася: яны былі ў захапленні, яны ўсё плакалі пасля мерапрыемства.”
Вікторыя зазначае, што ўсе гэтыя жанчыны настолькі непаўторныя, настолькі не падобныя адна на адну, іх аб’ядноўвае адно – гэта гора, боль, але яны вельмі аптымістычныя і вельмі цікавыя асобы.
Такія дабрачынныя івэнты з’яўляюцца вельмі важнымі як для культурнай прасторы Берасця, так і для тых людзей, якія ўдзельнічаюць у іх.
Вікторыя пастаянна нешта арганізоўвае, часта гэта кантэнт-сустрэчы ці нейкія іншыя мерапрыемствы, у яе шмат творчых планаў, але менавіта дабрачыннае мерапрыемства, калі будзе праводзіцца, то, магчыма, будзе прымеркавана да нейкай важнай даты, напрыклад, 8 сакавіка.
