Здаецца, што ў Берасці даволі шмат месцаў, дзе можна сустрэцца з сябрамі, перакусіць і добра правесці час. Але нядаўна адкрылася новае – цікавае і з унікальнай канцэпцыяй, якая парадуе, без перабольшання, кожнага.
Арт-дырэктаркай прасторы пад назвай ДЭПО з’яўляецца творчая і актыўная Аляксандра, якая пачынае расказ пра сябе так:
«Усім прывітанне! Мяне завуць Аляксандра, і я – арт-дырэктар новай яркай прасторы ДЭПО. Раней я працавала ў сферы моды і швейнага бізнэсу, дзе набыла каштоўны досвед і разуменне тонкасцяў брэндынгу і камунікацый. Але прыкладна два гады таму мяне накрыла новая хваля – я акунулася ў свет грамхарчу».
Усё пачалося з таго, што Аляксандра пагрузілася ў творчае жыццё кавярняў і бараў горада: стварала ўнікальныя канцэпцыі і атмасферу, якая аб’ядноўвае людзей. У працэсе яна шмат эксперыментавала з ідэямі і развівала свой творчы патэнцыял. З часам цікавасць да сферы ўзрасла, і, набраўшыся досведу, Аляксандра перайшла на кіруючыя ролі: курыравала каманды адразу ў некалькіх установах, усё больш і больш разумеючы ўнутраную «кухню».
«Паступова мой шлях прывёў мяне да кіраўніцтва і развіцця новага праекта. Увесь прызапашаны вопыт, веды і энергія таленавітай каманды ДЭПО ператварыліся ва ўнікальную прастору, якая ўжо займае асаблівае месца ў сэрцы нашага прыгожага горада. Гэта не проста фудкорт – гэта адлюстраванне нашага захаплення, крэатыву і любові да таго, што робім».
Ідэя стварэння фудкорту ў Берасці належыць уласнікам і кіраўнікам ДЭПО – брату і сястры, якія шмат гадоў паспяхова развіваюцца ў сферы грамадскага харчавання і выдатна разбіраюцца ў «кухні на колах»: яны ўжо шмат гадоў радуюць берасцейцаў на розных гарадскіх святах і мерапрыемствах краіны.
Новая прастора называецца цікава – ДЭПО, і гэтая назва мае арыгінальную гісторыю стварэння:
«Чаму менавіта ДЭПО? Добрае пытанне!
У нашай камандзе і сярод працаўнікоў прынята называць фуд-тракі „вагончыкамі“:
„Ты куды?
–У аранжавы вагон!“З прычыны таго, што наш фудкорт – стацыянарнае месца, то лепшага варыянту „прыпынку“ для гэтых вагончыкаў, чым ДЭПО, проста не знайсці. Таму мы вырашылі назваць нашу прастору менавіта так».
Ідэя стварэння нарадзілася з імкнення аб’яднаць цікавасць да вулічнай ежы, крэатыўнасць і цеплыню да Берасця. Досвед і натхненне кіраўнікоў паслужылі асновай для ўвасаблення канцэпта стацыянарнага фудкорта, дзе кожная дэталь адлюстроўвае іх любоў да гастраноміі і жаданне ствараць месца для сустрэч і яркіх уражанняў.
У канцэпце ДЭПО закладзена свая філасофія. Гэтае месца — не проста фудкорт, а сімвал аб’яднання гарадской культуры, крэатыўнасці і гастранамічнай разнастайнасці.
«„Вагончыкі“ сімвалізуюць мабільнасць, свабоду і творчасць. Мы вырашылі прыпаркаваць іх назаўжды, зрабіць часткай нечага пастаяннага.
Наш праект – гэта сучасная інтэрпрэтацыя ідэі вулічнай ежы ў стацыянарным фармаце і прастора забаў, дзе кожны знойдзе нешта па душы».
Гастраномія можа стаць мастом паміж людзьмі і культурай, а стацыянарнасць – гэта магчымасць замацаваць у горадзе атмасферу вулічнай свабоды і творчасці.
«Мы верым, што ежа – гэта не толькі смак, але і спосаб зносін, натхнення і стварэння новых ідэй».
Нядаўна прайшло афіцыйнае адкрыццё прасторы ДЭПО, якое падарыла незабыўныя ўражанні як наведвальнікам, так і стваральнікам:
«Адкрыццё прайшло проста цудоўна! Нягледзячы на праліўны дождж і навальнічныя хмары, наш фудкорт з радасцю прыняў неверагодную колькасць гасцей, і мы бязмерна ўдзячны кожнаму за падтрымку, цёплыя словы і гэты сапраўды незабыўны вечар! Гэтая дата – 7 чэрвеня – назаўжды застанецца ў нашых сэрцах як дзень нараджэння ДЭПО, дзень, калі мары сталі рэальнасцю.
Мы спявалі, танчылі, смяяліся да слёз, атрымлівалі асалоду ад смачнай ежы і сустракаліся з сябрамі – усё гэта стварыла атмасферу цяпла, радасці і яднання. І няхай надвор’е было капрызнае, нашы сэрцы былі поўныя святла і натхнення. Мы разышліся з упэўненасцю: гэта толькі пачатак! Сёння і заўсёды мы будзем рады бачыць вас на тым жа месцы, бо ДЭПО створана для таго, каб аб’ядноўваць людзей, дарыць усмешкі і ствараць новыя яркія моманты разам!»
ДЭПО – гэта сапраўдны цэнтр яркіх падзей і незабыўных уражанняў. Кожны тыдзень у Інстаграме публікуецца афіша мерапрыемстваў, каб госці заўсёды ведалі, чым жыве фудкорт. У ДЭПО выступаюць таленавітыя кавер-бэнды і музычныя гурты, запрашаюцца дыджэі, каб запаліць атмасферу танцпляца. Увечары праходзяць трансляцыі фільмаў і спартыўных падзей пад адкрытым небам.
Аляксандра расказвае:
«Мы супрацоўнічаем з маладымі крэатыўнымі людзьмі і арганізоўваем актыўныя гульні на прыродзе, квізы, музычнае лато!
А кожную нядзелю ў нас – сямейны дзень! У гэты дзень мы запрашаем аніматараў, робім дыскатэкі з мыльнымі бурбалкамі, роставыя лялькі забаўляюць малых, мы праводзім анімацыйна-інтэрактыўныя гульні, а на велізарным экране паказваем мультфільмы. І самае галоўнае – усе нашы мерапрыемствы абсалютна БЯСПЛАТНЫЯ! Проста прыходзьце з сябрамі ці з сям’ёй, атрымлівайце асалоду ад атмасферы і адпачывайце».
Арт-дырэктарка прасторы ДЭПО падкрэслівае: «Мы робім усё для таго, каб вы адчувалі сябе камфортна і ярка бавілі час». А калі ў вас ёсць ідэі ці жаданне супрацоўнічаць — пішыце ў Інстаграм! Разам мы зробім ДЭПО яшчэ больш насычаным і цікавым!
ДЭПО развіваецца кожны дзень, планы ў каманды проста касмічныя. Яны мараць пра тое, каб зрабіць ДЭПО яшчэ больш яркім, цікавым і ўтульным. У планах пашырацца, дадаваць новыя ідэі, ператвараць прастору ў сапраўдны аазіс натхнення і весялосці для жыхароў і гасцей горада.
«Мы жадаем ствараць унікальныя падзеі, здзіўляць вас новымі фарматамі і ператвараць кожнае наведванне ў незабыўныя прыгоды. Увогуле мы настроены на вялікія здзяйсненні, бо для нас галоўнае, каб кожны з вас адчуваў сябе часткай гэтага чараўніцтва!»
Гэтая прастора – магчымасць для жахароў Берасця цікава і смачна бавіць час, адкрыць для сябе нешта новае і непаўторнае, паўдзельнічаць у мерапрыемствах і, магчыма, знайсці для сябе новае хобі ці новых сяброў.