З Мінскага дзяржаўнага лінгвістычнага ўніверсітэту адлічылі трох актывістаў “Еўрапейскай Беларусі”, якія раней былі асуджаныя за ўдзел у акцыях салідарнасці.
Як паведамляе Праваабарончы цэнтр “Вясна”, 6 лютага з Мінскага дзяржаўнага лінгвістычнага ўніверсітэта (МДЛУ) адлічылі актывістаў “Еўрапейскай Беларусі” Аляксандра Салдаценку, Аляксандра Вялітчанку і Мікіту Каваленку, якія раней былі асуджаныя да адміністратыўных арыштаў за ўдзел у акцыях салідарнасці з палітычнымі зняволенымі ў Беларусі.
Аляксандр Салдаценка быў асуджаны на 7 сутак арышту за ўдзел у акцыі 25 кастрычніка 2011 года. Пасля затрымання на акцыі 26 кастрычніка 2011 году Аляксандр Вялітчанка атрымаў 15 сутак арышту, Мікіта Каваленка – 10 сутак, а 8 студзеня яшчэ 5 сутак арышту за ўдзел у новай акцыі.
Аляксандра Вялітчанку затрымлівалі за ўдзел у акцыі 2 жніўня 2011 года каля будынку Горацкай калоніі, у якой тады адбываў пакаранне палітвязень Зміцер Дашкевіч. Тады Аляксандра Вялітчанку пакаралі штрафам у памеры 30 базавых велічынаў.
Акцыя 2 жніўня 2011 году каля Горацкай калёніі, у якой удзельнічаў Аляксандар Вялітчанка.
У лістападзе 2011 года рэктар МДЛУ Наталля Баранава вынесла студэнтам “афіцыйнае папярэджанне аб недапушчальнасці супрацьпраўных паводзінаў” (копія – на здымку ніжэй), перавысіўшы тым самым свае службовыя паўнамоцтвы. З гэтай нагоды актывісты падрыхтавалі скаргі ў пракуратуру і Міністэрства адукацыі.
Паводле Праваабарончага цэнтра “Вясна”
Papiaredzhannie-mdlu
