Да ўвагі бацькоў, хто восенню павядзе дзяцей у садок! У Маскоўскім раёне Берасця можа быць адкрыта беларускамоўная група для дзяцей 2-3 гадоў, але пры ўмове, што набярэцца неабходная колькасць дзетак для такой групы.
Ніжэй змяшчаем зварот мамы, якая заклікае бацькоў падтрымаць яе ініцыятыву. У звароце вы знойдзеце таксама кантакты для сувязі з Марынай.
Кожны час выносіць свае патрабаванні да чалавека як да асобы і як да грамадзяніна сваёй краіны. Раней былі адны каштоўнасці і мэты, сення яны іншыя, але ніхто не ведае, якім будзе заўтра. Тым не меней, найбольш годнымі, гарманічнымі, цэласнымі і творчымі людзьмі заўсёды былі і ёсць тыя, хто ведае свае карані, хто адчувае сваю родную зямлю нагамі і любіць яе ўсім сэрцам. Тады ў чалавека есць жаданне жыць і працаваць, тварыць не толькі дзеля самога сябе, а для людзей навокал, для Радзімы.
Наша роля дарослых як бацькоў не толькі зберагчы ўсё тое багацце, якое створана нашымі продкамі і перадаць нашым дзецям, але і навучыць іх карыстацца ім. Стварыць такія ўмовы развіцця і станаўлення, якія дазволілі б не адчуваць сябе перакаці-полем, жывучым адным днём, а чэрпаць моц са сваёй зямлі і мець жаданне пакінуць на ёй свой след. Канешне, гэта не адзіная умова і не ўсе стануць паэтамі, навукоўцамі ці даследчыкамі, аднак годнымі людзьмі – абавязкова!
Найгалоўнейшым, на маю думку, у станаўленні нацыянальнай самасвядомасці з’яўляецца валоданне роднай мовай і любоў да яе. Бо як можна любіць і разумець традыцыі, калі яны на мове, якой не ведаеш, як можна з гордасцю казаць, што ты беларус, калі кожны можа у твар кінуць: “хто такія беларусы? вы нават мовы сваёй не ведаеце, ды і няма яе, гэта усе штучнае…”, як можна любіць Беларусь, калі ў школе плачаш над беларускімі падручнікамі, бо нічога не разумееш і клянеш і мову гэтую і краіну разам з ёй?
Хачу ўзняць пытанне выхавання нашых дзетак у дзіцячых садках (і школах) на беларускай мове. У Берасці няма аніводнага беларускамоўнага садка і нават групы. У аддзеле адукацыі абяцалі, калі набярэцца неабходная колькасць бацькоў, пайсці насустрач і стварыць на базе рускамоўнага садка беларускамоўную групу. У гэтым годзе мой малодшы сын пойдзе ў першую малодшую групу (2-3 гады), у наступным навучальным годзе надыйдзе час старэйшаму сыну ісці ў школу, таму шукаю бацькоў-аднадумцаў, якія гатовы выхоўваць і навучаць сваіх дзетак на беларускай мове.
Давайце аб’яднаемся, каб наша жаданне ажыццявілася!
Усіх ахвотных прашу званіць па тэлефоне (8-029) 790-35-25 (Марына).
