Антон Астаповіч просіць пракуратуру прыцягнуць да адказнасці намесніка старшыні Берасцейскага гарвыканкама Вячаслава Хафізава.
Па словах актывіста Руху “За Свабоду”, старшыни Беларускага добраахвотнага таварыства абароны помнікаў гісторыі і культуры Антона Астаповіча, 18 снежня 2009 года ён звярнуўся ў Берасцейскі гарвыканкам з запытам аб парушэнні заканадаўства падчас правядзення таргоў па продажы аб’ектаў нерухомасці, якія маюць статус гісторыка-культурнай каштоўнасці.
У адказе Хафізава ад 15 студзеня паведамляецца, што на аўкцыёне прадаваліся не аб’екты нерухомасці, а правы праектавання і будаўніцтва на пэўных зямельных участках. Як адзначае Астаповіч, гэта не адпавядае інфармацыі на афіцыйным сайце Берасцейскага гарвыканкама і не дае адказу на зварот па сутнасці, як прадугледжана заканадаўствам.
Ён просіць прыцягнуць Хафізава да адміністрацыйнай адказнасці па артыкуле 9.13 Кодэкса Рэспублікі Беларусь аб адміністрацыйных парушэннях за парушэнне пункта 4 указу прэзідэнта ад 15 кастрычніка 2007 года.
Як раней паведамляў БелаПАН, у канцы года Астаповіч звярнуўся ў Міністэрства культуры ў сувязі з планамі зносу помнікаў архітэктуры XIX—XX стагоддзяў у гістарычным цэнтры Берасця. Таварыства аховы помнікаў прыйшло да высновы, што гарадскія ўлады шмат разоў выстаўлялі на продаж помнікі архітэктуры для іх зносу і новага будаўніцтва, што з’яўляецца парушэннем закона аб ахове гісторыка-культурнай спадчыны.
