Берасцейскае грамадскае аб’яднанне «Экадом» будзе прывіваць юным жыхарам Берасця любоў да навакольнага асяроддзя. На замену пластыкавым пакетам актывісты будуць прапаноўваць льняныя экасумкі для пакупак.
Кіраўнічка праекта Алеся Ляўкоўская, адна з кіраўнікоў праекта мяркуе, што лён – добрая альтэрнатыва пластыку:
– Шыем льняныя сумкі, а затым плануем акцыю, у час якой будзем раздаваць гэтыя сумкі як альтэрнатыву пластыкавым пакетам. Калі казаць пра пластык, дык ён практычна не раскладаецца ў прыродзе. Час раскладу некаторых пластыкавых вырабаў дасягае нават тысячы гадоў. Пластык увайшоў у наша жыццё не так даўно, а значыць кожны яго кавалачак, што быў дагэтуль выраблены, практычна існуе ў прыродзе да гэтага часу і атручвае наша жыццё.
Акцыя пройдзе ў рамках экалагічнага праекта «Скажы пластыку не», што ажыццяўляецца пры падтрымцы Міністэрства замежных спраў Галандыі ды Менскага універсітэта імя Сахарава.
Паводле: http://racyja.com
