Падчас рэканструкцыі Берасцейскага тэатра лялек па вуліцы Леніна працоўныя знайшлі манеты.
Гэта адбылося падчас адвалу чарговай порцыі будаўнічага смецця. Уміг працэс пагрузкі спынілі і працоўныя пачалі збіраць артэфакты.
Пакуль на аб’ект прыбылі супрацоўнікі Ленінскага РАУС Берасця, людзі вынялі з грунта 33 польскіх гроша 1923 года выпуску і адзін відэлец.
Выкладчык Берасцейскага універсітэта імя А. С. Пушкіна, вядучы спецыяліст па археалогіі Аляксандр Башкоў распавёў, што падобнага роду знаходка ў горадзе над Бугам была знойдзена ў пачатку дзевяностых гадоў мінулага стагоддзя:
− Хавалі іх заможныя людзі перад надыходам гітлераўцаў. Яны спадзяваліся, што пасля вайны вернуцца і знойдуць свае каштоўнасці. Акрамя гэтага, у перыяд 20 – 30 гадоў XX стагоддзя сталовыя прыборы лічыліся рэчамі каштоўнымі. Таму не дзіўна, што з польскімі грашыма ў падставе тэатра знайшлі відэлец.
Праваахоўнікі знойдзенае канфіскавалі і перадалі для ацэнкі ў абласны краязнаўчы музей, дзе звычайна і праводзяць экспертызу выяўленых на тэрыторыі Берасцейшчыны скарбаў.
Паводле: zarya.by
