На фінішы першы конкурс у межах кампаніі “Наша мова”. Да 4-га лютага ўсе творчыя і нятворчыя берасцейцы мелі магчымасць даслаць сваю паштоўку на тэму “Кахай па-беларуску” з беларускім прызнаннем у каханні.
У суполцы “Наша мова” з 5-га па 9-е лютага праходзіла адкрытае галасаванне. На электронны адрас кампаніі [email protected] прыйшло 5 заявак з самаробнымі паштоўкамі.
Адразу ў першыя дні галасавання былі вызначаны відавочныя лідары – Яўген Ангалюк і Вольная Люся.
Вось як былі размеркаваны галасы:
Вольга Ярмолік: паштоўка “Люблю сціскаць твае далоні” – 16 галасоў.
Вольга Татуйка: паштоўка “Ты мая котка” – 26 галасоў.
Раман: паштоўка пра выдр – 31 голас.
Ігар Царук і Марына Палівода: паштоўка “Каханне” – 39 галасоў.
Вольная Люся: паштоўка “У кахання няма мяжы” – 104 галасы.
Пераможца конкурсу студэнт БрДТУ – Яўген Ангалюк, які набраў 132 галасы за паштоўку “Кахаю цябе”.
Яўген Ангалюк
Карэспандэнтка АРР “Дзедзіч” паразмаўляў з маладым берасцейскім талентам.
Дзедзіч: Чаму галоўным героем паштоўкі стаў снегавік?
На момант пачатку конкурсу былі дастаткова сур’ёзныя маразы і было шмат снегу. Быццам невялікая часцінка цяпла сярод марозных дзён – снегавік з сэрцам у далонях. Сёння, шчыра кажучы, не думаў, што ад снега застануцца толькі лужы.
Памочнікамі Яўгену выступілі графічны планшэт і веды з часоў вучобы ў класе з мастацкім ухілам
Малюю часцей за ўсё аўтамабілі і пейзажы, часам індустрыяльны пейзаж. Людзей не малюю, не ведаю як.
Яўген вучыцца на эканамічным факультэце на маркетолага. На пытанне, чаму не звязаў жыццё з прафесійным мастацтвам, студэнт адказвае:
Мне ад дому да ўніверсітэту ісці 5 хвілін, гэтым сябе суцяшаю. Ехаць у другі горад не было жадання і сродкаў. Насамрэч не было моцнага жадання.
Фотаздымач – лепшы сябар за аловак ці акварэлі
Дзедзіч: Ты размаўляеш па-беларуску ў жыцці?
На жаль, але не. Мае веды абмежаваныя. Паважаю нашу мову і людзей, якія вольна могуць размаўляць на ёй.
Дзедзіч: Як ты лічаш, чаму наша моладзь не размаўляе на мове ў жыцці? Можа, баяцца?
Людзі залежаць ад чужога меркавання, як бы яны ні аднекваліся. Можа баяцца, што хтосьці нядобра зыркне.
У вольны час ад вучобы Яўген здымае вяселлі. Кажа, што гэта больш хобі, чым праца.
Нагадваем, паштоўка пераможца будзе надрукавана ў колькасці 1000 асобнікаў. У Дзень усіх закаханых, 14 лютага, актывісты і студэнты, сябры “Харугвы”, АРР “Дзедзіча” і БГМГА “Аазіс” будуць раздаваць паштоўкі на вуліцах Берасця, канцэртах і мерапрыемствах.
Сябры, ужо на чарзе другі конкурс ад кампаніі – “Берасцейскі ВЕРШнік”. Пасля свята пазнаёмім Вас з умовамі конкурсу.
Кахайце ўсім сэрцам і душою!
Прэс-служба АРР “Дзедзіч”
