Кампанія «Наша мова» запрашае актыўных і знаходлівых берасцейцаў з 1 снежня акунуцца ў гарадскія прыгоды з гульнёй “Файна! Родна! Годна!”.
Бясплатны квэст “Файна! Родна! Годна!” — гэта выдатны спосаб адпачыць, лепш даведацца Брэст, зрабіць масу класных фота, адчуць дух спаборніцтва і атрымаць файныя прызы.
Сутнасць гульні простая, але цікавая: ў розных месцах Брэста будуць схаваныя «скарбы», адшукаць якія дапамогуць анлайн-падказкі на старонцы Нашай мовы. Так шпацыр па горадзе ператворыцца ў займальнае расследаванне, дзе трэба знайсці коды і цытаты беларускіх пісьменнікаў і хутчэй паведаміць аб гэтым ў групе гульні. Адгадкі будуць закладзены 1 снежня і з 17:00 аўторка варта прыступіць да іх пошуку, бо хто першы— той і малайчына. Драйв ад працэсу і радасць ад знаходак гарантаваныя!
Каб стаць удзельнікам гэтай бясплатнай гульні, любы ахвочы можа сабраць і зарэгістраваць каманду з сяброў або далучыцца да іншых гульцоў. Удзельнікаў чакаюць загадкі, даследаванні, адрэналін і, вядома, падарункі. Каманда-пераможца атрымае настолку ад symbal.by і торбу з фірмовымі сувенірамі ад арганізатараў. Каманды, якія зоймуць другое і трэцяе месцы, таксама атрымаюць па эксклюзіўнай торбе з прынтом «Вечны валацуга» і сувенірамі.
Для ўдзелу ў квэсце”Файна! Родна! Годна!”неабходна зарэгістравацца па гэтай спасылцы. Рэгістравацца можна на працягу ўсёй гульні, але зрабіць гэта трэба абавязкова.
Калі: 1-6 снежня.
Дзе: г. Брэст.
Гульня праводзіцца пры падтрымцы АРР «Дзедзіч». Удзел бясплатны! Усе падрабязнасці — vk.com/kvest_nashamova.
Даведка:
Кампанія “Наша мова” стартавала ў Берасці ў 2014 годзе. Яна прыцягнула вялікую колькасць удзельнікаў у свае крэатыўныя праекты: стварэнне паштоўкі “Кахай па-беларуску”, “Берасцейскі вершнік”, конкурс “Фотамаўленне”, акцыя “Мова дзеткам” і іншыя. У 2015 годзе кампанія працягвае праводзіць цікавыя конкурсы і мерапрыемствы і тым самым прыцягваць берасцейскую моладзь да актыўнага жыцця.
