Ствары сімвал Еўрапейскага клуба!

Рух “За Свабоду” запрашае ўсіх творчых людзей паўдзельнічаць у конкурсе на лепшы лагатып для заснаванай арганізацыяй сеткі Еўрапейскіх клубаў.

У шэрагу беларускіх гарадоў распачалі дзейнасць Еўрапейскія клубы, каб прапагандаваць еўрапейскую інтэграцыю і папросту раскрываць беларусам Еўрапейскі Саюз.

Мэты Еўрапейскіх клубаў:

• Папулярызацыя ідэяў еўрапейскай інтэграцыі Беларусі, уводзіны беларусаў у еўрапейскі кантэкст;
• Стварэнне дыскусійных пляцовак для абмеркавання прапановаў па паляпшэнні сітуацыі ў Беларусі праз набліжэнне да еўрапейскіх стандартаў;
• Звяртанне ўвагі беларусаў на інавацыйныя ідэі ў жыцці еўрапейцаў, папулярызацыя дзейнасці грамадскіх арганізацый і ініцыятываў.

На дадзены момант Еўрапейскім клубам патрэбны лагатып. Таму мы звяртаемся да ўсіх, хто здольны маляваць і нараджаць цікавыя ідэі, паспрабаваць стварыць яго.

Асноўныя патрабаванні да лагатыпа:

1. Працы могуць быць выкананыя ў адвольнай тэхніцы і колеравай гаме, з магчымасцю іх наступнай мадыфікацыі, напрыклад, у пячатку ці элемент бланка.
2. Выявы лагатыпаў прымаюцца ў электронным выглядзе ў фармаце cdr (CorelDRAW), jpg, а таксама ў выглядзе адсканаваных малюнкаў з іх абавязковым апісаннем.
3. Файлы з лагатыпамі не павінны перавышаць 5 Мб. Малюнак лагатыпа ў фармаце *.jpg мусіць мець памер, які дазваляе паўнавартасна ацаніць яго якасці (рэкамендаваны памер 1000-1600 пікселаў па большым баку).
4. Лагатып будзе выкарыстоўвацца Еўраклубамі розных гарадоў, таму на выяве павінна быць месца для размяшчэння назвы горада.
5. Лагатып мусіць быць простым і лёгка пазнавальным.

Лагатып можа ўтрымліваць назву “Еўраклуб” або “Еўрапейскі клуб”. Колькасць работ ад аднаго ўдзельніка неабмежаваная. Працы дасылайце, калі ласка, на электронную скрыню euroclub.miensk@gmail.com. У лісце пазначайце свае імя і прозвішча, кантакты: e-mail, тэлефон. Лісты прымаюцца да 10 кастрычніка 2011 г.

Аўтары найлепшых работ будуць адзначаныя прызамі. Пераможцу чакае грашовая ўзнагарода.

Арганізатары конкурса пакідаюць за сабой права далейшай публікацыі і размяшчэння конкурсных прац у сетцы інтэрнет у межах асветніцкай і іншай дзейнасці з пазначэннем імя аўтара.