Мову – у кожную таксоўку

Да дня Роднай мовы сябры моладзевай ініцыятывы “Аазіс” і БАМГА “Дзедзіч” раздалі кіроўцам маршрутак больш за 800 налепак з беларускамоўнымі абвесткамі. Мэтай акцыі стала павелічэнне прысутнасці роднай мовы ў нашым горадзе.

Актывісты вырашылі пачаць з папулярнага ў горадзе сродка транспарту – маршрутак. На канечных прыпынках і ў цэнтры горада валанцёры спынялі маршруткі, віншавалі пасажыраў і кіроўцаў з Сусветным днём Роднай мовы і дарылі кіроўцам налепкі з беларускамоўнымі абвесткамі, якія звычайна сустракаюцца ў гэтым відзе транспарту.

Аўтар ідэі, Старшыня Берасцейскай гарадской арганізацыі Партыі БНФ Віктар Клімус пракаментаваў для “Дзедзіча” мэту акцыі:

“Кожны народ мусіць дбаць пра захаванне сваёй спадчыны для будучых пакаленняў. Годна жыць і развівацца можна толькі маючы трывалы падмурак – культурны, ментальны. Нельга забывацца пра тое, на якой зямлі мы жывем, кім былі нашы дзяды і на якой мове яны размаўлялі.”

Адна з актыўных удзельнікаў акцыі Таццяна Хоміч адзначыла, што акцыя атрымалася вельмі пазітыўнай:

“Нашых актывістаў ветліва сустракалі і кіроўцы таксовак, і іх пасажыры. За дзве гадзіны ўчорашняй размінкі і крыху больш за 4 гадзіны сённяшняй працы мы раздалі каля 840 адзінак налепак. Безумоўна, гэта можыць сведчыць пра тое, што беларуская мова запатрабавана ў грамадстве.”

Нагадаем, што усяго былі выраблены налепкі 12-ці відаў. У працэсе абмеркавання ідэі і прапаноў тэкстаў мог паўдзельнічаць кожны карыстальнік сацыяльнай сеткі ўкантакце.

Дадзенае мерапрыемства стала дэбютам гарадской грамадскай кампаніі “Беларусь для кожнага”, якую распачала моладзевая ініцыятыва “Аазіс”.

Арганізатары спадзяюцца, што гэтая акцыя натхніць усіх неабыякавых да лёсу нашай спадчыны людзей да больш актыўнай дзейнасці. “Шкада, што дзень роднай мовы толькі раз на год,”– дадаюць удзельнікі акцыі. Яны паабяцалі што зробяць усё магчымае, каб роднай мовы у Берасці станавілася больш.